عمرك سألت نفسك ليه في حملات تسويقية بتنجح وتكسر الدنيا، وفي حملات تانية بتفشل حتى لو معاها ميزانية كبيرة؟
الموضوع مش دايمًا في الفكرة أو التصميم.. السر الحقيقي بيكمن في الخطة. والخطة دي لازم تكون مبنية على أساس متين ومنظم.
وهنا بييجي دور نموذج سوستك او SOSTAC Model، اللي يعتبر من أقوى النماذج في عالم التسويق، واللي أي مسوق شاطر لازم يعرفه ويستخدمه.
يعني ايه SOSTAC Model؟
الـ SOSTAC Model هو اختصار لست مراحل أساسية بتمر بيهم اي حملة علشان تبني خطة تسويقية ناجحة ومنظمة
- الـ Situation Analysis وهو تحليل الوضع الحالي
- الـ Objectives وهو مرحلة تحديد الأهداف
- الـ Strategy ودي المرحله اللي هترسم في الاستراتيجية
- الـ Tactics وهنا هنحدد التكتيكات اللي هنشتغل بيها
- الـ Action وده المرحلة اللي هنبدأ فيها بالتنفيذ
- الـ Control ودي اخر مرحلة واللي فيها بيتم المتابعة والتقييم
النموذج ده عمله “Paul Smith”، وبيساعدك ترتب خطواتك وتفكر في كل تفصيلة وانت بتخطط لحملتك.
-
تحليل الوضع الحالي (Situation Analysis)
قبل ما تبدأ أي خطوة، لازم تبص حواليك وتفهم وضعك في السوق. اسأل نفسك:
- احنا فين دلوقتي؟
- مين الجمهور اللي بنتعامل معاه؟
- مين المنافسين؟ وإيه اللي بيخليهم مميزين؟
- إيه نقاط القوة والضعف عندنا؟
- السوق ماشي في المجال بتاعك ازاي؟
ممكن تستخدم أدوات زي تحليل SWOT أو PESTEL علشان تجمع البيانات وتكون عندك رؤية واضحة قبل ما تبدأ.
-
تحديد الأهداف (Objectives)
بعد ما فهمت الوضع كويس، لازم تحدد أهدافك بوضوح.
والأهداف بتاعتك دي لازم تكون SMART:
يعني محددة، قابلة للقياس، واقعية، مرتبطة بزمن محدد، ومناسبة لاحتياجاتك.
مثال لهدف SMART هو لو مثلا عايزين نزود التفاعل على إنستجرام بنسبة 30% خلال 3 شهور أو نحقق 15% زيادة في المبيعات خلال الربع الجاي.
-
الاستراتيجية (Strategy)
في المرحلة دي بتبدأ تحط الخطة العامة اللي هتوصلك لأهدافك.
يعني هتشتغل على ايه؟ مين الجمهور اللي عايز توصله؟ وازاي هتوصل له؟
هتحدد:
- الشرائح المستهدفة
- الـ Position بتاع البراند
- الرسائل التسويقية
- المنصات اللي هتستخدمها
الاستراتيجية هي العمود الفقري للخطة، ولازم تكون مبنية على فهم حقيقي للجمهور والسوق.
-
التكتيكات (Tactics)
هنا بتدخل في التفاصيل الصغيرة يعني hيه الحملات اللي هتنفذها؟ وهتشتغل على أنهي منصة؟
مثلاً:
- حملة إعلانات ممولة على فيسبوك
- شغل مع Influencer معين
- أو مثلا Emails هتبعتها
- محتوى فيديو على تيك توك
دي المرحلة اللي بتترجم فيها الاستراتيجية لخطوات تنفيذية على أرض الواقع.
-
الأنشطة والإجراءات (Action)
دي مرحلة التنفيذ وبتحدد مين هيعمل ايه، وامتى، وازاي؟
يعني:
- فريق المحتوى هيبدأ يجهز البوستات
- فريق التصميم هيعمل التصميمات
- مسؤول الإعلانات هيظبط الحملات وميزانيتها
كل حاجة بتتوزع بشكل منظم عشان الشغل يتم بسلاسة وبدون تأخير.
-
المتابعة والتقييم (Control)
آخر خطوة، بس من أهمهم هي انك لازم تتابع وتقيّم الأداء أول بأول.
هل الحملة ماشية في الاتجاه الصح؟ ولا محتاجة تعديل؟
هنا بتقيس النتائج باستخدام مؤشرات زي:
- معدل التفاعل
- عدد النقرات
- معدل التحويل
- نسبة الوصول
ولو في حاجة مش مظبوطة، بتبدأ تظبطها في الوقت المناسب.
الـ SOSTAC Model مش مجرد نظرية، دي أداة عملية بتنقلك من العشوائية للاحتراف.
سواء كنت بتشتغل في وكالة تسويق، أو عندك مشروع خاص، النموذج ده هيساعدك تحط خطة واضحة تمشي عليها وتحقق بيها أفضل نتائج.
لو عايز تبدأ حملة تسويق قوية، خلي SOSTAC Model دايمًا معاك خطوة بخطوة
